Suksesverhale
In ’n vinnig veranderende wêreld met toenemende uitdagings vir veral jong mense wat die beroepswêreld moet betree, is daar ’n paar dinge waaraan jong mense moet vashou. Prof. Jannie Rossouw, voormalige hoogleraar aan die Wits Sakeskool en ’n direkteur van die Noordelike Helpmekaar-studiefonds (NHS), het 10 lewenswenke vir jong mense gedeel op ’n prestige-byeenkoms in Johannesburg waar toppresteerders, wat met NHS-lenings studeer, onthaal is.
1. Maak deurdagte keuses. As toppresteerder lê die wêreld aan jou voete, maar probeer goeie keuses maak gegrond op beskikbare inligting. Dít is jou verantwoordelikheid. Niemand anders kan dit vir jou doen nie.
2. Wees versigtig met krediet. Sodra jy begin werk, gaan jy oorval word met aanbiedings van mense wat vir jou geld wil leen. Dink mooi. Lenings neem lank om af te betaal. “Om skuld te betaal, te beperk en oordeelkundig aan te wend, is ’n baie goeie strategie.”
3. Vertrou Suid-Afrika se onderrigstandaarde. Die gehalte van naskoolse onderrig in die land is goed en sal so bly. Wees dus gerus oor die gehalte van jou opleiding en kwalifikasie.
4. Sê dankie. Ook wat betref jou opleiding en ander geleenthede. Gebruik dieselfde energie om dankbaarheid te betoon as wat jy gebruik het om hulp te vra.
5. Behou fokus te midde van onsekerheid. Ondanks kommer oor die situasie in Suid-Afrika en oorloë en ander onstuimighede in die buiteland, moet jy jou fokus behou. Sukses volg op harde werk, nie op paniek of angs nie.
6. Speel jou kaarte so goed as moontlik. ’n Mens kry nie altyd waarvoor jy vra nie, en jou lewenspad sal ook nie sonder duwweltjies wees nie. Maar die vermoë om teleurstelling te aanvaar en hanteer, is deel van groei en sukses.
7. Aanpasbaarheid is noodsaaklik. Die wêreld verander voortdurend en daarom moet jy voortdurend aanpas en nuwe kundighede aanleer. “So byvoorbeeld het pryse in Suid-Afrika sedert 1976 weens inflasie geweldig gestyg. As ’n mandjie goedere toe R10 gekos het, sal dit nou gemiddeld R600 kos. Bruinbrood se prys was 12c en die prys van petrol aan die einde van 1976 was 22c/liter.” Dit is werklikhede waarby ’n mens eenvoudig moet aanpas.
8. Inflasie is niemand se vriend nie. “Ek gebruik dus die uitdrukking Inflation is ungood.” (Sy handelsmerk) en dit is iets waarmee ons moet saamleef. Al is jy nog jonk, moet jy nou al dink aan jou aftrede en goed beplan aangesien “inflasie in die aftreejare probleme kan bring, want die inkomste hou nie tred met prysstygings nie”.
9. Beskerm ons vryheid van spraak en mediavryheid. Dié verantwoordelikheid rus op die skouers van vandag se studente. “Onthou ook dat vryheid van spraak beteken dat ons mag praat, maar dat diegene wat van ons verskil, ook die reg het om gehoor te word, én die reg om te praat sonder vrees vir nagevolge.”
10. Geniet die lewe. Selfs diegene wat gemiddeld presteer, kan suksesvolle loopbane hê. So vergeet soms ’n bietjie van die erns van die lewe en geniet waarmee jy besig is. “Die lewe is kort, geniet elke dag en geniet elke ding wat gedoen moet word. Gryp elke geleentheid aan!”
— Wilma de Bruin
Die Noordelike Helpmekaarstudiefonds (NHS) staan op die eenvoudige, maar kragtige beginsel van ons help jou nou sodat jy ander later kan help. Studente kry ’n studielening en begin dit ná voltooiing van hul studies terugbetaal, sodat ’n volgende geslag weer dieselfde geleentheid kan kry.
So het Johan de Wet, voorsitter, gesê op die prestige-byeenkoms in Johannesburg, waar uitblinkers met merietetoekennings vereer is.
Hy het daarop gewys dat daar in 2026 85 nuwe lenings toegestaan is. Dit beteken dat meer as 300 jong mense tans óf studeer óf hul lenings afbetaal. In die fonds se byna 60-jarige bestaan, het hy na raming tussen 2 000 en 3 000 jong Suid-Afrikaners op hul pad na sukses gehelp.
De Wet het verwys na die direkteure van die NHS, wat toesien dat dié geld reg bestuur word, en gesê dit is ‘n groep mense met wye kennis op uiteenlopene gebiede. Onder hulle tel professore, doktore, regs- en finansiële kundiges en ‘n ekonoom, wat reeds ses keer as Beeld se Ekonoom van die Jaar erken is. Hulle word nie betaal nie, maar stel hul tyd, kennis en ervaring vrywillig beskikbaar in diens van jong mense.
Die daaglikse bestuur berus by Frits Kok en Liana Bezuidenhout, wat volgens hom hul werk met toewyding doen en ware tweede ouers vir NHS-studente word. Daarvan getuig die voortdurende kontak wat hulle met die leninghouers én hul ouers het.
“Maar eintlik gaan dit oor die NHS se eregaste vandag, almal van hulle cum laude-graduandi wat hier vereer word. Hulle is lewenslustige jongmense, vriendelik en geesdriftig. Mense met wie jy oorlog toe gaan. Dit is egter nie ‘n oorlog nie met bomme, missiele en hommeltuie wat ellende, verwoesting en hartseer saai nie, maar ‘n oorlog wat die belofte inhou vir ‘n Suid-Afrika waarin ons almal veilig, positief en in liefde en vrede kan woon.”
Húlle is vereer
het ’n BSc-graad in menslike fisiologie, genetika en sielkunde aan die Universiteit van Pretoria verwerf, asook ’n BSc Honneurs-graad in menslike genetika met lof aan die Universiteit van die Witwatersrand. Sy is besig met ’n nagraadse diploma in publieke gesondheid – “’n veld waarin ek ’n besondere belangstelling het en wat ek graag met my bestaande kennis wil integreer, terwyl ek daarna streef om uiteindelik 'n dokter te word."
het in 2025 ’n BA-graad in geesteswetenskappe met lof aan die Universiteit Stellenbosch verwerf. Haar spesialiteitsvelde was geskiedenis en sosiologie. Sy het in 2026 begin met ’n honneurs in geskiedenis, waarin sy vaardighede ontwikkel in omgewing- en bewaringsgeskiedenis, met die oog op werk in omgewingsbeleid of verdere navorsing.
het ’n graad in elektromeganiese ingenieurswese aan Noordwes Universiteit met lof verwerf. Hy werk by OnTrack Technologies op Potchefstroom se vliegveld. Sy studiejare was moeilik ... “tot God ingegryp het. Ek het toe nie my eerste eksamen gedruip nie, en vier jaar later is ek besig om te werk, met my studies in ingenieurswese Cum Laude agter die rug. En dieselfde bonatuurlike rustigheid en vrede oorheers steeds my lewe.”
het die graad LLB met lof aan die Universiteit van Pretoria verwerf. Sy is ’n kandidaatprokureur en wil haar leerkontrak binne die volgende jaar suksesvol afhandel sodat sy haar loopbaan in die regsveld “met toewydig en integriteit kan voorsit”. Benewens haar studies, handhaaf sy ook ’n gesonde en aktiewe leefstyl deur onder meer gereeld aan Crossfit- en Hyrox-geleenthede deel te neem.
het die graad MBChB aan die Universiteit van Pretoria met lof verwerf – “ ’n prestasie waarvoor ek baie dankbaar is en wat jare se harde werk en deursettingsvermoë weerspieël.” Vir Wilmari is geneeskunde nie net ’n loopbaan nie, maar iets wat haar na aan die hart lê. “Ek sien daarna uit om as jong dokter ’n verskil in mense se lewens te maak.”
het in 2025 sy onderwys-graad van vier jaar vir die fase Senior en Verdere Onderwys en Opleiding (VOO) met fisiese wetenskap en ingenieursgrafika en ontwerp (IGO) aan die Noordwes Universiteit met lof verwerf. Hy is ’n onderwyser aan die Hoërskool Lydenburg in Mpumalanga en geniet sy werk terdeë.
het die graad MBChB met lof aan die Universiteit van Pretoria verwerf. Sy werk as ’n intern, waar sy daagliks die geleentheid kry om haar kennis in die praktyk toe te pas en verder te ontwikkel “in ’n veeleisende, maar vervullende omgewing”. Benewens haar akademiese prestasie, het sy ook baie baat gevind by kliniese blootstelling en interaksies met pasiënte en kollegas. “Hierdie ervarings het my nie net as student gevorm nie, maar ook as mens, deur my te leer om met empatie op te tree, onder druk te funksioneer en verantwoordelikheid te aanvaar in uitdagende situasies.”