Op die ouderdom van 20 kan ek met sekerheid sê dat elke stap van my reis deur God se genade gelei is. Op skool het wiskunde en ontwerp vinnig my gunstelingvakke geword, aangesien dit my liefde vir probleemoplossing en kreatiwiteit gevoed het. Ek glo dit het die fondasie vir my belangstelling in argitektuur gevorm.
Van ek 10 jaar oud was, het ek geweet ek wil 'n argitek word, en in 2024 het daardie droom begin ontvou, toe ek aanvaar is vir die Universiteit van Pretoria se argitektuurprogram.
Om in 'n koshuis in te trek, het 'n wonderlike hoofstuk van nuwe vriendskappe en persoonlike groei ingelui. My eerste jaar was uitdagend, maar ook ongelooflik bevredigend, en ek was bevoorreg om deel te word van die Golden Key International Honour Society.
Ek het nog 'n lang pad om te stap voordat ek my graad voltooi, maar ek gaan elke oomblik daarvan geniet. Tog kan ek nie wag om ruimtes te skep waar mense gemaklik en gewaardeer voel nie, om 'n gebou te ontwerp wat iemand eendag “huis” sal noem. Argitektuur is alles waarop ek gehoop het: 'n Manier om kreatiwiteit en logika te kombineer terwyl ek idees laat lewe kry.
Ek is oneindig dankbaar vir die konstante liefde en ondersteuning van my familie en vir die vriendskappe, nuut én ouer, wat my lewe verryk. Dit is 'n voorreg om ‘n loopbaan te begin bou in dit waaroor ek so passievol is, en ek sien uit na elke nuwe stap in hierdie reis, altyd vertrouend op God se plan vir my.